Жас дарындар үшін жаңа көкжиектер
Өңірдегі балаларға қосымша білім берудің жаңа дәуірінің басталуының айшықты нысанына айналған Орал қаласындағы Балалар техникалық шығармашылық орталығы ауқымды жаңартудан өткен соң білім алушыларға қайтадан есігін айқара ашты. Бұл жоба Орталық басшысы Бақытжан Мәуленовтің бастамасына Парламент Мәжілісінің Заңнама комитетінің төрайымы Снежанна Имашеваның, сондай-ақ Орталықты жөндеу мен жаңартуды толық қаржыландырған «NNEF» Қоғамдық қоры мен «Халық» қайырымдылық қорының қолдау жасауы арқасында жүзеге асырылған болатын.
«Елімізде білім беруді дамыту – біздің Қор қызметінің басты бағыттарының бірі. Біз халықтың әлеуметтік осал топтарынан шыққан дарынды балаларға гранттар береміз, мектептерді материалдық-техникалық жабдықтармен қамтамасыз етеміз, мұғалімдерге қолдау көрсетеміз және оқушыларға кәсіпкерліктің негіздерін үйретеміз. 2016 жылдан бастап біздің Қор білім беру саласын дамытуға шамамен 10 миллиард теңге бөлді, оның 60 миллионы Оралдағы Балалар техникалық шығармашылық орталығын жаңартуға бағытталды. Біз еліміздің балаларының заманауи технологияларға тең дәрежеде қол жеткізуіне және болашақта лайықты бәсекеге түсе алуына күш салатын боламыз», деп атап өтті «Халық» қорының директоры Сағынбек Шүңкеев.
2006 жылдан бастап Орталық Оқушылар сарайының бөлме-жайларын жалға алып келеді. Көрсетілген демеушілік көмектің арқасында Орталықтың материалдық-техникалық базасы жаңартылып, мұның өзі заман талабына сай жабдықтарды сатып алуға мүмкіндік берді.
«Бөлінген қаржының 14,5 миллионы ғимарат пен шатырды жөндеуге жұмсалды, ал қалған қаражат 36 Spike Prime роботтехника жиынтығы, 30 моноблок және жоғары жылдамдықты FPV дрондары сияқты заманауи жабдықтарды сатып алуға жұмсалды. Жабдықтардың жаңартылуы оқушылардың оқу сапасының артуына және олардың білім жарыстарына дайындығын жақсартуға мүмкіндік береді. Өткен жылы Орталықтың тәрбиеленушісі Даниил Казымов Қазан қаласында өткен Дүниежүзілік ойындарда жетінші орынға ие болып, өңірдегі техникалық шығармашылықты дамытудың жоғары деңгейі мен болашақтағы мүмкіндіктерін паш етті», деп пікір бөлісті облыстық балалар техникалық шығармашылық орталығының директоры Бақытжан Мәуленов.
Тіпті аудан орталығынан алыс жерде тұратын балаларға да тиісті жағдай жасалған. 69 жастағы еңбек ардагері Қамбар Сармалаевтың айтуынша, ол қаладағы осы ауданның орталығынан бір жарым сағаттық жол жүретін жерде тұрады. Ал ол жақта тұратын балалар мұнда жолдың алыстығынан келе алмайды. Өйткені олар бір жарым сағат жол жүріп келеді, содан соң бір сағат жиырма минут сабаққа қатысады да, кері қарай тағы да бір жарым сағат жол жүреді. Олардың мұнда келгені тиімсіз. Сондықтан қай мұғалім қаланың қай ауданында тұрса, сол аудандағы мектептің директоры мен осы аудандағы мектептің директоры келісімшартқа отырады. Осы құжатқа сәйкес, ол мектептің директоры мұғалімдерге бір бөлме белгілеп береді, басқа да қажетті жағдайларды жасайды. Осының өзі балалардың үлгерімін барынша арттыруға жәрдемдеседі.
«Бір кездері біз жұмысты бастағанда мұндай заманауи техникалық мүмкіндіктер жоқ болатын. Біздер бәрін қолдан жасадық, аннан-мұннан алып құрастырдық. Ал қазіргі балардың мүмкіндігіне қарап отырып, қызығасың. Осы мүмкіндіктердің арқасында қазір балалардың жетістіктері де жоғары. Бұл – өте қуанышты жағдай», деп өз ойымен бөлісті ол.
Орталықты жаңғырту
Бөлінген қаражатқа «NNEF» Қоғамдық қоры Балалар техникалық шығармашылық орталығында ауқымды жөндеу жұмыстарын жүргізді. Орталық 3D принтерлер мен 3D сканерлерді, квадрокоптерлерді, экшн-камераларды, қажетті бағдарламалық жасақтамасы бар моноблоктарды және роботтарды құруға және бағдарламалауға арналған білім беру жиынтықтарын қоса алғанда, түрлі заманауи жабдықтар алды. Бұл жаңа жабдықтар балаларға дрондар ұшыру дағдыларын дамытуға, бейнемазмұндар жасауға және жарыстарға қатысуға мүмкіндік береді. Компьютерлік сыныптарды жабдықтау студенттерге роботтехника, инженерия және бағдарламалау негіздерін іс жүзінде үйренуге мүмкіндік береді. 1998 жылғы 15 желтоқсанда құрылған «NNEF» қоры – бөбекжайдан бастап жоғары оқу орындарына дейінгі барлық деңгейлерді қамтитын «Lifelong learning» үздіксіз білім беру жүйесін белсенді түрде дамытып, ілгерілетіп келе жатқанын атап өткен жөн.
«NNEF» қорының қызметкерлері қажетті жабдықтар мен компьютерлік техниканы таңдау және сатып алу бойынша кеңес берді, ғимаратты жөндеу жұмыстарын ұйымдастырып, жүргізді. Қордың IT университеттері Орталық педагогтері үшін біліктілікті арттыру курстарын ұйымдастырып, оқытушылар мен білім алушыларға университеттердің ресурстары мен сараптамалық білімдерін пайдалануға мүмкіндік беруге дайын», деп атап өтті «NNEF» қорының білім бөлімінің басшысы Мария Көпжасарова.
Парламент Мәжілісінің депутаты Снежанна Имашева балалардың білімін арттыруға қажет заманауи техникалық жабдықтар мәселесінің шешілуіне қолдау көрсеткен Қор жұмысына сәттілік тіледі.
«Бүгінгі заманауи техниканың мүмкіндігімен балалардың қол жеткізетін жетістігі – еліміздің ертеңіне қосылатын орасан үлес екені анық», деді ол.
Тарихи маңызы мен болашағы
1956 жылы құрылған Оралдағы Балалар техникалық шығармашылық орталығы бүгінде шын мәніндегі маңызды білім беру мекемесіне айналды, онда балалар технологиялар мен техникалық шығармашылық саласындағы дарынын дамыта түседі. Жақында жүргізілген жаңарту жұмыстарының арқасында Орталық өз оқушыларының білімін жетілдіріп, ой-өрісін кеңейту ісін жалғастыра бермек. Мұның өзі жас жеткіншектерге болашақ мамандық таңдау туралы шешім қабылдауға және табысты келешектің негізін қалауға көмектеседі.
Осы ретте Қазақстандағы өмір сүру сапасы мен білім беруді жақсарту жөніндегі бастамаларға белсенді қолдау көрсетіп келе жатқан «Халық» қайырымдылық қорының үлесін атап өткен жөн. Қор 120-дан астам әлеуметтік және қайырымдылық жобаларды іске асыруда, осы мақсатқа 85 миллиард теңгеден астам қаражат бөліп отыр.
Ұқсас Басылымдар
